العباة الرهيفة ـ من ردا الحظ

من ردى الحظ قلبي .. طول الأيام ؛ خايف
خايفٍ ؛ والليالي .. ما تجي له ؛ بكيفه

ما تجي ؛ له بكيفه .. مثل ما كان ؛ شايف
غيب ؛ الأيام جاء له.. بالظروف ؛ الكليفة

بالظروف ؛ الكليفة .. والشقاء ؛ والكسايف
والسهر ؛ والترجي .. بالدموع ؛ الذريفة

بالدموع ؛ الذريفة.. حيل ما هي ؛ خفايف
حين ؛ ماليلها اظلم..بالهموم ؛ العنيفة

الهموم العنيفة .. بالضلوع ؛ النحايف
خلت ؛ القلب يرجف.. بالضلوع ؛ النحيفة

بالضلوع النحيفة .. بين يأس ؛ وحسايف
وش تفيد ؛ الحسايف .. والقدر حط سيفه ؟!

القدر ؛ حط سيفَه ..دون سيد الولايف
حال ؛ من دون شوفه .. ما بقاء غير ؛ طيفه

ما بقى ؛ غير طيفه..داخل القلب ؛ طايف
طيف زين الوصايف ؛.. بالقدود ؛ اللطيفة

بالقدود ؛ اللطيفة .. يا لطيف ؛ اللطايف
يوم جيته ؛ وجاء لي .. بالعباة ؛ الرهيفة

بالعباة ؛ الرهيفة .. ما لها من ؛ وصايف
بالهوى ؛ يوم رفَّت .. رف قلبي ؛ رفيفه

رف ؛ قلبي رفيفه .. فوق ذيك ؛ الردايف
مع ؛ نسائم مساها .. فيه فرحة ؛ وخيفه

فيه فرحة ؛ وخيفه.. بين وصْل ؛ ونكايف
آه ؛ يا ويل حالي والإجازة ؛ قصيفه

الإجازة ؛ قصيفه .. والليالي ؛ عجايف
والخطاوي ؛ تعرقل .. دون زَل ؛ القطيفه

دون ؛ زَل القطيفه .. والزهور ؛ العطايف
الأمل ؛ والأماني .. ضاع مني ؛ نصيفه

ضاع ؛ مني نصيفه .. صيْفها صار ؛ زايف
آه ؛ لو كنت ماني .. مرتبط في وظيفه

مرتبط في وظيفه .. لعن أبوها ؛ الوظايف
ما عرفت ؛ السعادة .. لحظةٍ لو ؛ طفيفه

لحظةٍ ؛ لو طفيفه.. شوف ذيك ؛ الشفايف
والعيون ؛ النواعِس .. والخدود ؛ النظيفه

الخدود ؛ النظيفه .. والثمان ؛ الرهايف
صرت ؛ من دون شوفه ..كن عيني ؛ كفيفه

كن ؛ عيني كفيفه .. غيرها الشوف ؛ عايف
ما يبي ؛ شوف عيني .. غير شوفة ؛ وليفه

غير شوفة ؛ وليفه.. سيْد كل ؛ الولايف
آااه ؛ يا حسرة اللي .. ما اهْتَنى ؛ في مصيفه

ما اهْتَنى ؛ في مصيفه .. طول الأيام ؛ خايف
خايف ؛ والليالي..ما تجي له ؛ بكيفه