يا فهيد - بندر المنصوري

يا فهيد .. حمس البن بالهون.. ماهو بالعفاش
قيّس على النار .. وتعيّن حطبها لا يزيد

درّجه فالمحماس ولا ترمش عنه عينك إرماش
حتى يتناشط والحذر لا يذهبه حامي الوقيد

شقرته طيب وريحة اعلاج روس(ن) ماتناش
تعنا له الاقدام لوهي منابيته بعيد

يا فهيد .. لا تنشد ترا مالي على زود النقاش
مشهاتي الدله وقوم(ن) تزارقنا القصيد

في خايع(ن) من عقب مسياله يباريه انتعاش
الوسم حي(ن) في جنوبه و منزاله فريد

نصيحتي يا غرّ... ما فيها ملام ولا غشاش
النصح يشرونه قديم والله على نصحي شهيد

رجل(ن) بلا دين اتركه.. حصيلة المقسوم ماش
ماينحسب فاهل السما ولا ينحسب فاهل الصعيد

ماله من العزّه نصيب لو الذهب تحته فراش
مدخاله ومخراجه يدبره شيطان(ن) مريد

واقنع من الدنيا ترا ما جاك....مقسوم المعاش
والطيب خلّه في حسابك وخلّه لك رصيد

واحفظ ثلاث البيض ولا تاقف على ساس(ن) هشاش
وارفع سموك عن غثارب حيلها ماتفيد

ما تستوي ابيوت الذرا يا فهيد مع روس العشاش
فرق الثريا عن ثرا وفرق الوفا عن الجحيد

يالله بياض(ن) فالتوالي قبل لف القماش
بالطيّبه تختم لي وحسن(ن) ليا قالو فقيد

© 2024 - موقع الشعر