الجنوب

يا راكب اللي لا مشى ما تنذكر فيه العيوب
عليه من رسم الشياطين لا بيّن جداه

خبيره امدربه ما ضراه في غير الدروب
ابن الجميح امفيّنه وا سعد من هو زد قناه

جمس(ن) يطب السوق ما ينهب سوى نبض القلوب
يشعف ضريسه كل مرّار لا دارة رحاه

ياللي نويت ابه السفر توك قبل وقت الغروب
ادري بمنهاجك وتدري بقلبي وش بلاه

انحر به اليمّه ولامج مشاريف الجنوب
تله ولا يشحنك ما يرزاه قول اللي شناه

لله دره ما يغيظ اللي على ظهره ركوب
ولا هو من اللي يجلب الخله ليا قدّم عطاه

و اليا وصلت اللي منيفات من هاك النصوب
خل الغروب اف ميسر احجاجك ولا قدمك سواه

رجم(ن) مثل برزان ما تومي به اصلوف الهبوب
عليه ما زالت ذعاذيعه مداريج ابحماه

وان حولت جاله على حظه من الديمه سكوب
متعلي(ن) سبحان ربه على القوه بناه

اهناك عهد اللي وفا لو كان سمّوه اللعوب
الرجم يبرالك ونقش الغلا بسفل حصاه

دونه زمان و خافق الروح ما ظنه يتوب
سلّم عليه وبلّغه سلام خل(ن) ما نساه