يا خالها

يا خالها الله يحرم قلبك الراحه
وعسى سنينك إلين الموت مسودّه

دامك طعنت الخفوق وزدْت بجْرآحه
جعل الخفوق اللي مات بذمّتك عدّه

أدميت قلبي وحرمته طعم أفراحه
يومك على الفرقا جيت البارح تحدّه

ضيعتني وضاع حبي وضاعت أرباحه
والحزن عاث بفؤآدي البارحه وهدّه

ما كان حبي لها مسنونه ارماحه
كان اطهر الحب لكن الزمن ضدّه

كان ازكى من زهرة ٍ بالعطر فوّاحه
كان اعظم الحب مابه أي حب قدّه

كان القوي اللي هزّ القلب واجتاحه
كان الوفي اللي مابه عايق ٍ صدّه

لكنك اليوم تعدم حبي في الساحه
خليت إيديني تترك بالغصب يدّه

أواااااه وشلون تحيا روحي مرتاحه
واللي أحبه فقدت البارحه ودّه

ما وده يبعد ولاهي روحه منزاحه
والا عيونه تكبّ الدمع في خدّه

أواااااه يا وين ابلقى بعده الراحه
وبقلبي له ورده لكن ... ذبلت الورده