نهاية وصالك

نهاية وصالك يالعفيف النظيف الذرّب
بداية غرامً تلّ قلبي ولا كبّه

بعد ما أستحلّ وحلّ من دون ضرّب وحرّب
وليفً رهيفً مر دربي على دربّه

أنا الواهم الظالم وانا اللي بديت الدرّب
وانا ماهقيت ان الطبيب أنقلب طبّه

روى وأرتوى مني وانا ميتً للشرّب
زواني ولا اسقاني وانا منوتي شربّه

مشينا سوى وأثر الهوى ما يجي بالضرّب
نهب ثم ذهب والنار فالجوف مشتبّه

تراني بشرّ مسلم ولا أضنك من الصرّب
ترفق بمن يشكي على الناس من حبّه

ومدام أن قلبي وجهته مع صلاتي غرّب
عسى نيتك بالبعد والصد منقلبّه

تعوّد تسوق ركاب شوقك لدربي سرّب
وأشوفك غلا ثم أشتم البعد وأسبّه

وإذا كان ورد الحب في البعد عوّد زرّب
عساني ما اموت بعاصف الموج والغبّه

حسيبي على اللي فالهوى يقطعون الدرّب
ولا أقول غير أن الوليّ ربي وربّه