بالـوردي او الزهـري

هنا اعترافي يسجل والزمن يجري
يجري على قولهم ..( مطبوق طبلونه)

اللي على شانها .. جالس ومتحرِّي
لي حول ساعه وقلبي نبضه ايخونه

قالوا لنا حاضره .. لاكنّ ما ندري
حضورها وين هو .. ياللي تقولونه

حضورها عارفه .. وابداعها النثري
اللي جلب شرّد الافكار .. مقرونه

لا توهموني .. تروا ماني على خبري
القلب مفجوع .. والاشواق مجنونه

الاسم موجود بالتوقيت .. من بدري
يوم انها سلّمت لطفاً .. وممنونه

مرت على صفحتي .. واستأسرت حبري
ياحبري اللي يسيل الحبر .. لعيونه

مرورها دايم آحطه على .. صدري
وسام .. واغلى اوسمة غيره يجي دونه

اكتب لها البيت .. والبيتين من شعري
والشعر لو في سواها ليش .. يحيونه

أخط الابيات بالوردي .. او الزهري
لعل شعري يلامس طبعه .. ولونه

والله .. ماجيت بالابداع يا فكري
قبل تصير الحنايا فيه .. مفتونه

اغليتها لو يقولون الغلا .. قبري
وهي على كيفها في روح .. مرهونه