ملـهـمة شـعـري

ياهجوسي .. ملهمة شعري تري ماهي عنيده
العنيد الفكر .. لا غابت يضللي فكر غابر

تحسب الاشعار نطبعها مثل طبع الجريده
لا مشاعر .. لا معاني .. غير تحسينة مظاهر

علميها يا هجوسي بعض الاحوال الاكيده
قبل ما تحكم على شاعر وهبها قلب طاهر

كل ما غابت تعاتبني تقول .. ( آنا بعيده )..!
لو قريبه من خفوقك وين تأثير المشاعر ..؟

اعرف اللي ودّها يحصل وعارف وش تريده
ليتها تدري وتعلم فالغياب .. آصير حاسر

حاسر القامه .. وكنَّ القلب من يشلع وريده
كيف باكتب بيت ..؟؟ لا بالله انا ماني بقادر

اصلا ابيات الحزن والهم والضيفه عديده
ويش لي بالضيق والخافق لضيقاته معاصر

خلّلها ترضى .. وتبقى مثلما كانت سعيده
يوم كان الشعر صرفه مثل صرف اعز تاجر

كنت افطرها قصيده .. قبل اغديها قصيده
وآخر الليل ان تمنَّت .. كنت اعشيها خواطر