بـقـايـا الـروح...

علميني يابقايا الروووح عن ماضي زماني
وعلميني كيف تقدير الامور العاطفيَّه

علميني عن حبيب صار من حبي يعاني
والخطيه لو ادور ماحصل مني خطيِّه

غير لامني سألته بالسؤال أصير جاني
صرت أحس اني غريب وما أحس اني خويِّه

يمكن اني قد عصيته أو يكون انه عصاني
ان عصيته وان عصاني ما عصا العاشق بنيِّه

علميني كيف اببدي فيه ترتيب المعاني
بعد ضيعت القرايه والحروف ألأبجديِّه

كان يسألني من اول لين يعرف ون مكاني
والحقيقه ليه يسأل كان من خوفه عليِّه

وش تغير بالدقيقه وش تغير بالثواني
بعد كانت شي واحد أصبحت شي .. وشويِّه

علمي له يابقايا الرووح ماحبيت ثاني
وعلميه اني أحبه.. والمحبه له هديِّه