لاتسألوني ليه ... او ... كيف ... او ... ليت؟

البارحه في تالي الليل ونيت
ونة خلوج(ن) تو ميت ولدها

ونيت انا من حر مابي وغنيت
والنفس تعبت عقب جابت جهدها

رقيت انا راس الطويله وعديت
جتني هواجيس(ن) تداوا رعدها

ونيت ونفوس الخلايق توابيت
والعين سلال الليالي سهدها

انا اشهد اني في هواها تشقويت
هاضت جروحي والسبب حر يدها

تلحقني الكيه بكيه ولا امسيت
وباسبابها عيني لحقها رمدها

لي صاحب(ن) قفى وانا عقبه اقفيت
والنفس طير الحظ عقبه جحدها

عطيته امن الود حلوه وخليت
مر(ن) تشربته وحالي هجدها

ياكثر ماهزيت انا الراس واوميت
الياتذكرت السنين ونكدها

من عقبهم لانيب حي(ن) ولا ميت
من بين خلق الله وروحي وحدها

ادوج في درب(ن) به العام زليت
واذكر مرابيع(ن) لنا في لحدها

ماتت مرابيع(ن) لنا كم تمنيت
فالقلب وعروقه تهاوت عمدها

لا تسألوني ليه...أو كيف..أو ليت
بس المهم حبال وصله عقدها