الأندلس موووووول

ليتك معي ياضيف فالاندلس مول
امداك شفت البارحه وش جرالي

امداك ميت ضحك من قلب وتقول
سوّ اصدِقَه دامك من الشر خالي

لو مالله اسلم راسك امداك مشيول
لَقرب طواري منّقل فالهلالي

ياضيف جت وحده على ايدين ورجول
ماهيب لامهره ولاهي غزالي

الصدق هي طرقا وتسلب لها اعقول
لاكن خبيث الروح مابه جمالي

بعيونها قليل وآكون ماكول
تكحلت مني مهو بالدلالي

جت مسرعه والكتف بالكتف مشتول
تأسفت قدام اوجّه سوالي

كنْها تقول انّا امتساوين بالطول
ماتدري انْ تحْتي جميع الطوالي

كني اقول اهبي فعيونتس الحول
ولطولها والعرض ماختّ بالي

ماني متين ولاني ابشخص مفتول
لاكني ارسا من كبار الجبالي

هي تحسَبْ اني باتلفلف تقل رول
وآشوفها وآقول ياويل حالي

طنشتها ثمْ جات ثمْ قلت يحّول
قالت تراني لك أمد الحبالي

قلتلّها رقمي لشرواك مقفول
ويرن لادقوا هلي والرجالي

قالت تراني بنت واصل وماسول
لو اشتكيك اتروح فيها بدالي

قلتلّها راضي لَوَ آموت مقتول
واعطيك لجل آموت من حر مالي

بس الاهم ان الطلب غير مقبول
أموت مني ماغضب ذو الجلالي

يابنت انا مانيب مايع ولا كول
رجّال لو ان الشكل حيل حالي

أنا تراني عند شرواك مجهول
أبغى من الرب العوض بالحلالي

لاكن طسّي فيك ماتنفع احلول
ألا على امقفّاك ينزل عقالي

قدام اكمّل طسّت اوتسبق اخيول
تشبه لموتر دز فسباق رالي