عذر الغياب

إي و الله إني فيك مغرم و ذايب
لكن تحكمني في حبك.. ظروفي

إحساس طفل ٍ يحكمه فكر شايب
لين انكسر حلمي على حد خوفي

أغيب في ذكراك مانيب غايب
و ارسمك بسمة في ثنايا حروفي

و القاك شرهة في عيون القرايب
و اجمعك حلم يبدد الياس جوفي

و ابعدك عن فرصة نظر كل خايب
و آخذك ,, و اسلمك سمعي و شوفي

أغليك يا كل الغلا و الحبايب
و ارفع لك أيمان الغلا في كفوفي

و احاول اجمع من حروفي عجايب
و انا ادري إن الشعر ما هوب يوفي

دخيل عبرات العيون السكايب
يا متلفتني في تماديك روفي

وش في يدي ،،، ليه العتب و الطلايب
وشلون ابا اشرح لك دواعي عزوفي

أمسي و انا مقدم على الموت هايب
الحزن بيتي و الروابع ضيوفي

اخذت حبك في خضم النوايب
منفى ,,, و لو ماني مطول وقوفي

العمر فرصة و المحبة وهايب
و انا على رجواي اسابق حتوفي

اما خذيني حلم و البال طايب
و الا اعذريني و ازهدي في طيوفي