وإن ضاعت الهقوة

الفقر طب النفوس اللي تبا الزومه
اي و الله انه علاج الزوم و الكبره

يا عنك ما يطرح الرجال و عزومه
الا كثير اللزوم و قلة الدبره

لا قام مطنوخ قوم و قومته قومه
الاولة غايته و الغاليه شبره

خلى تناسي الهموم من أول همومه
يكابر الهم مير الهم يا كبره

و اليا ذكر راس ماله ضاعت علومه
راح الفضا في عيونه مثل سم ابره

و الناس كل على حظه و مقسومه
اللي عمر دنيته و اللي عمر قبره

لا و الله الا و بعض الناس ما الومه
لو كل موقف نبا ناخذ منه عبره

و المشكلة كل نفس تقول مظلومه
و الحزن باب انفتح ،، و الليل يا صبره

يا جاهل الحزن عان الحزن و رسومه
اقرى تعابير وجه الحزن في عبره

و الله ما يحرم الرجال من نومه
الا صديق ٍ من اول كان معتبره

لا جاه في واجبه و يدور لزومه
و الياه ما هو الصديق اللي على خبره