الهقوة المرجوّة

يوم اطلق الفكرة بساعة صحوة
من صلب راس وفيض باس وقوّة

ترعد حروف الخالدي بالحدوة
وباسمه تغاوى فاتنة ومزهوّة

واتمختري يا زينة و يا حلوة
خطو الملوك وبالفخر مكسوة

عشقي لها عشق ابدوي للعزوة
اللي عروقه بالوفا محشوّة

طبعي وأنا لاهل الهداوة قدوة
واللي تجاهلني أكدّر جوّه

تسري من أقفاص المعنّى لبوة
عزّ الضحى ونور الخلايق توّه

ما جت على حوش الفلايح سطوة
عقب العشا وذي عادة السلعوة

تهوي على نطّاحها من علوة
وكل العزوم بوجهها ممحوّة

مخلابها يقطع وصال الكلوة
ولا عاد تنفع ليته .. ويا لوّه

إما بقى للطير منها غدوة
وألا مشى طول العمر متشوّه

إن صحت في (صنين) ذلّت (شبوة)
وتشوش للصيحة عروق الدوّة

جنبت قيفاني شذوذ الهفوة
وتجوهر بطيب الغلا محلوّة

تحرم عليها خلوةٍ أو نزوة
ألا على طيب وصفا ومروّة

وما ارضى لها غير الثريا صهوة
ولا تخيب .. الهقوة المرجوّة