رد اعتبار

لا تفرح ... الله لا يفرحك بالعيد
تفرح بضيقة خاطري و انكساري

المقبلات من الليالي مواعيد
و موكل الأيام تاخذ بثاري

أنا لي الله رازق الوحش بالبيد
من حيث لا يقدر و لا هوب داري

والرزق لو هو قو عزم و تجاهيد
ما شبع ثور و لا طوى الجوع ضاري

يا حظ ما تقهر قلوب الحواسيد
تعمل على نصري و رد اعتباري

أرهقت روحي بالسهر و التواجيد
ألوم ليلي و استحي من نهاري

بعض الرجا مثل الربا كل ما زيد
ينقص بقدر الرجل و الامر جاري

اللي شريته بالغلى باع بزهيد
و اكثر منادي بالوفا ما يماري

و لو كان يكفي المتن دون الأسانيد
كان اكتفينا عن صحيح البخاري

يا ويل قلب ٍ يعرف الحق و يحيد
و يا ويل من حط الحسود استشاري

وش عاد و الهقوات جتني مجاهيد
و مستعتب ٍ قلبي على ما يداري

ما تجرح الشرهات غير الأجاويد
و يا هاجسي ما جيت لي باختياري

مارجي من الجاهل موده و تمجيد
و لا عارض ٍ شعري على كل قاري

و ان شفت من بعض الوجيه التصاديد
اللي خذت من وجه ليلي مواري

صديت صدة مبتسم دون تفنيد
صدت بدو باسلوب جدا حضاري

و اخذت لي في رحلة الحلم تاكيد
و بخاطر ٍ ما لاج به كل طاري

سجيت لو ان المسافة جراهيد
و الواقع المشؤم اذبه يساري

و اغيب عن ميلات الايام ,, و بعيد
احطب ظلام الامس و اشب ناري

و اقطع من البيدا على غير تحديد
و اهدم جدار الياس و ارفع جداري

و اخذ من أسباب ( النجوم العناقيد )
ما يقهر الظلمة في وجه الغداري

و اليا انتبهت أقوم لله توحيد
ارفع يدي و ارخي من الموق جاري