أحبك ليه ..؟!

لـ وليد رأفت محمد، ، بواسطة سماهر، في غير مُحدد

أحبك ليه ..؟! - وليد رأفت محمد

أحبِّك ليه ..؟!
 
وأنا منِّك .. وآه منِّك
 
أنا هَمِّك وشريان الحياه منِّك
 
كأنِّك شمس جوَّايا
 
يشع الضى برَّايا
 
أكون دمك
 
ونصبح خلطه سريه
 
قويه .. عَفيه .. سحريه
 
قوليلى يا سمره يا بهيه
 
.. محبش ليه ؟!
 
● ○ ●
 
أحبِك ليه ..؟!
 
وأنا منِك .. وأنا فيكى
 
وعشقى جوه ف عروقى يناديكى
 
يا روح الروح هوى غالى
 
هواكى ف قلبى موالى .. أغنيكى
 
على لسانى
 
هواكى نبض وجدانى
 
يا وحشانى .. محبش ليه ؟!
 
● ○ ●
 
أحبك ليه..؟!
 
ونيلك زاد بيروينى
 
وندِّعة شوق تاخدنى لفوق تقوِّينى
 
تخلينى أعود واعى
 
أصون العِرْض بدراعى .. تضمينى
 
وباتعطَّر
 
أشم هواكى أتخدَّر
 
يا قلب أخضر .. محبش ليه ؟!
 
● ○ ●
 
أحبِك ليه ..؟!
 
وأنا ف العشق لِسَّه غَشيم
 
أنا فِطرى وع الفطرة اتخلقت حليم
 
تشوفى شكلى متغيَّر
 
وعَرَقِى مَرَقِى مِتْحَيَّر .. و بَرْدُه لئيم
 
ما انا ريفى
 
هواكى ربيعى وخريفى
 
هوى كيفى .. محبش ليه ؟!
 
● ○ ●
 
أحبك ليه ..؟!
 
وأنا لا ابو زيد ولا عنتر
 
لكن ف العشق والقوة أنا أكتر
 
وباقدر أشد أفراحى
 
وألملم نجمى صبَّاحى .. وهوه أخضر
 
ما انا الغاوي
 
أنا اتميدي • وغمراوى
 
في قلبي عشق مصراوى .. محبش ليه ؟!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر