غُنا عشقك

لـ ، ، بواسطة سماهر، في غير مُحدد

زمان قُلنا .. زمان عِيدنَا 
 بإن الكلمة يوم عيدنا .. تكون موال 
 أنا القوَّال بَتَكْوِينى 
 أحبك غنوه بتجينى .. تقوِّينى 
 .. بِيِكْوِينى هوى حُبِكْ 
 وطيب قلبك 
 .. يداوينى 
 أتوه منى ف سواد نِنْى 
 ورمش عنيكى يهدينى 
 يصحّينى 
 .. أفوق للشوق 
 و ياخدنى هواكى لفوق 
 أطير وأرف بجناحى 
 وألم النجم صبَّاحى 
 وضاحى هوايا جوَّايا 
 لِيلاتى يغنى ويايا .. قمر صاحى 
 يا ست الكل 
 يا ست الكل 
 عشقتك فاس وفسقية 
 وشجرة فل طَرّاحة .. وصفصافة 
 ونسمة حب هفهافة .. 
 وعرافة .. 
 وطوافة 
 وساعة الَخطَرة شوّافة .. هواكى يدل 
 عشقتك راحة و رحاية 
 وقُلة قديمة مملية حاضِنْها الخيش 
 و ريمه .. هايمه ع الميه 
 قلوب ع الحب محنيه 
 يا شجر التوت 
 وجرن وحارة وشوارع 
 وقشه وعشه ومزارع 
 وناس وبيوت 
 وقشطه وزبده فلاحى 
 يا ست الكل 
 عشقتك مَيّه 
 و زهرة حُب وردية وجنية هناك ع الشط 
 عروسة بحر لُولِية 
 ولو ليٌا نصيب راح اغيب 
 ف بحر الحب والأعاجيب 
 يلهلبنى الهوى لهاليب وعقلى يشت 
 عشقتك رُكن ضلايه 
 ف ساعة العصر ويايا 
 بنكتب كلمه بتنبت .. رسايل عشق 
 و باغزل م الهوى توبى 
 أتارى الحب مكتوبى .. ودايب عشق 
 عشقتك جسر وقنايه و بَحرَاية وموج البحر 
 يا راميه السحر ف جدورنا 
 إيدين الحب تبدُرنا 
 ولو دورنا .. 
 نعلق فوق على صدورنا 
 .. عقود التبر 
 ما دام البذره مرويه هوى غيه 
 وطيب فطرة " قلوب خضرة " 
 وأصل الرك ع النيه 
 .. هوانا البكر 
 عشقتك طير 
 يا وش الخير 
 يا رغبة شِعرى ف التغيير 
 يا مْسَلٌمة 
 يا عشق مليان أوسمة 
 يا ملِهمه 
 مفتوح لها باب السما 
 قلبى سما 
 يا مسمسمه 
 هايم بعشقك إنما 
 بالقى ف عنيكى المغرمة 
 حكايات كتير 
 عشقتك يا ضِيا عينى 
 وحبك شامة ف جبينى 
 يا أجمل حلم في سنينى 
 .. أنا ليكى 
 .. و انا الرحَّال 
 قصايدى طوال أغنيكى 
 و اداديكى 
 و افاديكى .. ما انا عاشقك 
 غُنا عشقك بقى زادى 
 ف طول مشوارى زوادى 
 هويتك زهره ف الوادى 
 عشقتك جنه طول عمرى بغني لك 
 أنا اللى عنيكى بتمنى 
 أنا .. نيلك .

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين