والجفا نار ولهيب آآه ياصعب الجفا - ناصر عبيد الرشيدي

الهوى يا أهل الهوى عمر جوه ما صفا
مثل حال الطقس مرات ينقص أو يزيد

الغلا برد الشتاء والوصل فيه الدفا
والربيع القرب وعند التلاقي يوم عيد

والجفا نار ولهيب آآه ياصعب الجفا
مثل وقت الصيف كلٍ يسافر به بعيد

جفني اللي من غياب الحبيَب ماغفا
ينتظر من سافر وراح وخلاني وحيد

واحدٍ علمني معنى المحبه والوفا
والقوافي وبحر الألحان وحروف القصيد

واحدٍ كله وفا حتى شوفه لي شفا
شوفته تجلا همومي وتجعلني سعيد

ياظروفٍ عاندتني ترى يكفي كفا
مابقى للصبر طاقه ولا عندي رصيد

في غيابه كل همٍ على قلبي لفا
والحراره يوم عن يوم في صدري تزيد

ماني بقايل بعد طول صبري له آآفا
مالي إلا دعوةٍ ياعسى الدعوه تفيد

الله يجيب المطر من بعد وقت الجفا
المواصل يحيي القاع وتنبت من جديد

© 2024 - موقع الشعر