يابو المواقف ما وصل منك تقصير - محمد البياضي

ياطير يالليّ تصفق الريش وتطير
ما انت مقيد يا طليق الموامي

سابح بجو الكون من دون تحيير
وما خيرونك فالشفا والتهامي

بعطيك خط ومحتوى الخط تعبير
من داخل الوجدان ما به كلامي

احساس صادق ما دخل فيه تزوير
ويترجم شعوري ولو في منامي

هاك الكتاب ووصل الخط يا طير
ومن قبل لا تسلمه رد السلامي

سلم على الليّ لا وصلته على خير
سلام تسليم الرجال الحشامي

شهم وخيار ومن علو المناعير
تلقاه في جده رفيع المقامي

خالد ولد فايز بشيمه وتقدير
ماهومجرد اسم بين الاسامي

فعله سبق عمره وهو شب وصغير
صيته شهر من قبل عشرين عامي

الطيب والنوماس والمرجله غير
مطبوعةٍ بك عن كثير الانامي

يابو المواقف ما وصل منك تقصير
بمنحك تاج المرجله والوسامي

هذا قليل بحقك وحقك كثير
يا بعد كل اللي تغطى ونامي

في ساعةٍ يضعف بها كم تفكير
لا ضاقت الدنيا وصارت عسامي

وان لوذت بقعاء بحكم المقادير
اما الفرج والا وجيه الكرامي

والليّ زبنك بخير ياراعي الخير
تاقف معه وقفة صليب العظامي

علمك ابوك ولك رسم خطة السير
وضّح طريق النور لك والظلامي

واوصاك في طاعة ولي التدابير
واكد على ركن الصلا والصيامي

ووصاك بخوانك من صغير وكبير
وعلى حقوق الوالده يالعصامي

وعلى حقوق الجار وايضا المسايير
وعلى الوفاء والطيب والاحترامي

وانت استجبت وطعت ما قلت ما يصير
وعرفت ماهو لك حلال وحرامي

وميزت فرق ورودها والمصادير
لا تزاحمن فوق الحياض الضوامي

ومجزي بخير اللي عطاك المعايير
علمك لين اصبحت حر ٍقطامي

الحر الاشقر صار من فعلك يغير
كفك عطيب وفيه مخلاب دامي

وانا بك افخر فالليال المعاسير
يا مسندي فاللازمه يا حزامي

وما قلت هذا من خيال ٍوتصوير
من جود فعلك يا بعيد المرامي

© 2024 - موقع الشعر