][][وين انت يالضرغام][][

الغالي اللي عن عيون الغلا غاب..
ذكراه تبقى حاضره في غيابه..

أعذره وأقول المغيبه لها أسباب..
وأحضن بصدري طيف حضرة جنابه..

وين أنت؟ يا نبض الغرام الحشا ذاب..
وقلبي بغيبتك الفرح ما إهتنابه..

وين أنت؟ ياسيد الولايف والأحباب..
وين أنت؟ يانبع الأدب والذرابه..

وين أنت؟ يالضرغام فكاك الأنشاب..
وين أنت؟ يادرع الوفا والحرابه..

وين أنت عن قلبن من إمفارقك ذاب..
قلبن مايفتح لأي مخلوق بابه..

إلا أنت فاتح لك غلا كل الأبواب..
ويهدي لك أشواقه ويقصر عتابه..

شوف الدموع اللي على سود الأهداب..
تعبيرها: حزن! وهموم! وكآبه!

والله لأشيب وحبك العذب ماشاب..
في خافقي يلقى ليالي شبابه..

يحق لي أسأل عن الهجر بعتاب..
وأقول عن غيبتك وين الأجابه..

إن كنت في حبي مشكك ومرتاب..
قلي وأجاوب مايزيل أرتيابه..

لكن غيابك دون تبرير وأسباب..
جرحن بقلبي ماحسبنا حسابه..

في صدتك ضاقت عروقي والأعصاب..
وشلون تجفاني وحنا قرابه!!

مشكور في هجرك لو الجرح ماطاب..
كل الجروح اليوم عندي تشابه..

خذها عهد لو غبت طاريك ماغاب..
ومثلك ماترخص قيمته في غيابه..