][][ حمر النواظر ][][

بنت الرجال اللي لها بالزمن طيب..
لي منهم عدوا كبار الأسامي..

حمر النواظر جامعين المكاسيب..
بالفعل ماهو بالحيل والكلامي..

حمر النواظر حافظين المواجيب..
اللي لهم بين القبايل مقامي..

بالشعر أرتب أعذب الهرج ترتيب..
وبالفعل لي فعل(ن) عن الناس سامي..

بنت(ن) سوات الذيب وأطيب من الذيب..
الذيب يسري مثل مسرى الحرامي..

وأنا فعولي مثل عكف المخاليب..
شيهانة(ن) تجرح كبود الحمامي..

ترقى على وضح النقا مابها ريب..
ترقى بعز وطيب بنت القطامي..

ياهوه أنا ما أقرب من الدس والعيب..
أطلع مثل بدر الدجى للنيامي..

واللي يدور بي شكوك وعذاريب..
مايفقد ألا هيبته وأحترامي..

والحب مالي عنه بالوقت تجنيب..
ومافيه أحد منا ماذاق الغرامي..

الحب بلوى عذب الناس تعذيب..
نسمع قصص عنه بشرق(ن) وشامي..

وماكل من يرمي هدف دايم يصيب..
وكم رمية(ن) صابت ومن غير رامي..

بنت(ن) سلايل من جمع عز(ن) وطيب..
حمر النواظر في نهار الزحامي..

وتمت عدد ماخط حبر المكاتيب..
وعداد من سلم ورد السلامي..