][][ الى حمد آل غضيض ][][

من دار أبو ناصر وريث المجد والعزه سلام..
لدار أبو مشعل عريب الجد كساب الفخر..

سلام عد الورق ماغنت وماطار الحمام..
سلام والتوقيع بالمرسول من هاجس قمر..

من بعدها بانت خيوط الصبح وإنزاح الظلام..
ورفت طيور الخير فرحانه بزخات المطر..

نادوا حمد والسالفه ماهي حلال ولا حرام..
تحتاج من حضرت بعيدين النظر لفتة نظر..

قريت لك بيتين مابين النصر والإنهزام..!
والإنهزام المر طعمه غير عن طعم النصر..

مدري ولكن في ضميرك شي تجهله الغشام..
وضحت لك شطرين فيه وغاب عن شرحك شطر..

مدري تبيها سالفه تصحا بها كل النيام..؟
ولا تبيها مزحة المزاح بقهوة العصر.!؟

لو مانعرفك زين يانبع الوفا والأحترام..
قلنا: معانيها خطيره وأنت سببت الخطر..

لكن يابن غضيض علمني عن الناس الصيام..
اللي تصوم ايام ماصامت اسبوع ولا شهر..

وإن ماقدرت تقولها سلم وخذ مني سلام..
من دارنا دار الكويت الطيبه لأهل قطر..