تصدقين .. أو ما تصدقين - حسين السبيعي

يا حبيبة لو تفرقنا السنين
ما نسيتك يا حبيبة ، لا .. حرام

ويا حبيبة لاتلومي وتعتبين
الظروف اللي عليها أكبر ملام

لو صفت دنياي وظروفي تزين
كان أشوفك كل يوم بانتظام

ما ابتعدت برغبتي ، وعندك يقين
إني ذايب في هواك ومستهام

ورغم بعدي والله إنك تعرفين
ما بقلبي من محبة واحترام

في بعادي كم جرح صدري الحنين
وكم جفت عيني ملذات المنام

لأنك أغلى أمنياتي يا ضنين
أحلف بمنشي سحابه والغمام

والغلا واضح على وجهي يبين
واضح أوضح من قمر ليل التمام

ما يبي له لا شهود ولا يمين
ثابت بقلبي ، وله عالي المقام

مالك بقلبي شريك ولا طبين
أنتي عمري ، وأنتي روحي ، والغرام

وأنتي في دنياي شمسٍ تشرقين
بدّدت بأنوارها ليل الظلام

وأنتي السر الخفيّ اللي دفين
وسط قلبي يا بعد كل الأنام

وأنتي اللي يوم أجيك تودعين
قلتي إرحل دربك أخضر والسلام

بأنتظر رَجْعَتْكْ والباري ضمين
ويشهد الله مالي بغيرك مرام

ويوم ربي راد أجيك وتسمعين
جيت أشوفك يا حبيبة ، وفي الختام

تصدقين .. أو مو مهم تصدقين
المهم إنك سمعتي هالكلام

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر