بايع الود - حسين السبيعي

من باعني بالرخص بعته بلاشي
ولا عاد له في وسط قلبي مكانه

وأعطي على فرقاه تسعين حاشي
لو أشتريهن بالأجل والديانه

اللي يبيع الود مرباه لاشي
ويستاهل الفرقا وزود المهانه

مادام طاع اللي بقلبه غشاشي
خل الحياة تعلمه في زمانه

وأنا أحمد الله بعزة النفس ناشي
ولا همني راعي الغدر والخيانه

أمشي على ما كنت أنا فيه ماشي
مشيي سنود ولا مشيت نْحيانه

ومهما يلاقيني بدربي عتاشي
أتجاوزه والله عليه الإعانه

وألقى بداله من يزيد انتعاشي
خلٍ جمع عقل وجمال ورزانه

وأقاسمه في راسمالي ومعاشي
وأرهن له الروح العزيزة رهانه

وعينٍ له لحافٍ وعينٍ فراشي
واللي يبيه يصير في وقت أوانه

وأهديه باقة من عطور الغراشي
هديةٍ للي يصون الأمانه

وطاقم ذهب مع خاتمين وغواشي
ويستاهل أكثر من لي الود صانه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر