شب راس الفتيله

اذبح الفتنه وترث دسايسها ولدها
وان غفلت عن الولد شب لي راس الفتيله

وانصح العربان لكن ما تعرف سعدها
وين راع المعرفه قبل تلحقها الفشيله

قبل لا تكبر علينا وتصعب في عقدها
منهج التازيم خلوه واسعوا للجميله

البلد مايحتمل دعوتن يرفع سندها
ياكبر حمل على متنه الواهن يشيله

قد عقدتوا مبرم الامر في رفعة عمدها
ويوم جا للامر لازم قطعتو كل حيله

كل واحد راح يم فزعته يأكد وعدها
كن ما وسط البلد غير ربعه والقبيله

ذر فعيون المغفل رماده ثم رمدها
واقتبس من شعلة السو ما يصبح دليله

وجاك مثل المزنه اللي تحذف لك بردها
كل ليل يلوح برقه على عرض المخيله

قام يجرد له سيوف صقيله من غمدها
وابتدى سرد العلوم العريضه والطويله

كبرت الدعوى ولا بان غيْها من رشدها
والحصيله راحوا الناس ماجابو حصيله

لي متى واحنا على ردها واجمع عددها
ملت الاسماع من وعدكم ياهل الفضيله

لا تغثونا بكبر الدعاوي مع جهدها
وفطنو في حالنا كل يوم وكل ليله

كان شبت نار فتنه تحطبنا وقدها
وان تفرقنا شتاتا طعمنا الحنظليله

وان وأدناها وهي توها تحضن مهدها
صار تمرير الحبايل علينا مستحيله

واذبح الفتنه واعقب مرارتها ولدها
ثم يجزع كل ما قلت خذ راس الفتيله