ياكليب شب النار ياكليب شبه

لـ دغيم الظلماوي، ، في المجالس والقهوه، آخر تحديث

ياكليب شب النار ياكليب شبه - دغيم الظلماوي

ياكليب شب النار ياكليب شبه
عليك شبه والحطب لك يجابي

قلط لها ياكليب من جزل خبه
وشبه الى منه غفى كل هابي

حنا علينا جيب ماها وحبه
وعليك تقليط الدلال العذابي

اغدي ليا شبيتها ثم قبه
تدعي لها ربعن سراتن غيابي

لوهم بعيدن شوف ضوه ينبه
ولاهم قريبينن بنبح الكلابي

بنسرية ياكليب ياشين غبه
ليا نسنست لاكنها سم دابي

متلطمين وناطحينن مهبه
متكتفين وسوقهم بالعقابي

خطو الولد ياحيف ما ينحسب به
معيرتن على غضير الشبابي

وش عاد لو يلبس زبونن وجبه
يصير منهم من حساب الزهابي

الوالمه ياكليب عجل بصبه
والرزق عند اللي ينشي السحابي

صبه لقرمن صرفته ماحسب به
يوم البخيل مكنهب الوجه هابي

وثنه لمصدورن ليا جاه نبه
يرخص بعمره والدخن له ضبابي

وعده عن اللي مايداري المسبه
اللي يدور بالقصير الغيابي

واحمس على جمره مع احراق حبه
لما تشوف العرق على الحب ذابي

ودقه بنجرن تالي الليل نبه
يشادي لذيبن لاعوى براس نابي

ودق البهار وبهره ثم صبه
تصبغ على الفنجال مثل الخضابي

ومن يوجعه راسه ترى الهيل طبه
وليا تقهوا غاية الكيف طابي

نذبح لهم كبشن عريض الملبه
ومن مذبح السكين حس الركابي

كم كبش مصلاحن لراسه نجبه
ولو زودوا فيه الثمن مانهابي

مع الشتال مزينن طبخ حبه
والعذر مع هذا وزين الجوابي

ونبدي لهم ياكليب هرج المحبه
لاجنب الهين عريض العلابي

وبهرجن احلى من شخاليل جبه
واحلى من السمن الجديد العرابي

يارب ناخذ تالي العمر عبه
من قبل لاينسف علينا الترابي

الصبر زين وراعي الصبر غبه
يرقى بروس مشمرخات الهضابي

ومن لاصبر ياكليب في حكم ربه
هذاك يوم البعث ماله ثوابي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر