يا زين شب النار حل التعاليل

يا زين شب النار حل التعاليل
في مربع عله من المزن سبار

يدنى لها سمر خشبها محاويل
يجلب سناها اللي من البعد خطار

تلقا دلال البن فوقه مناهيل
واللي لفا يلقى مقام ومقدار

حق المسير يا الربوع المشاكيل
بن ويبرى له جنى زين الاثمار

تمر الصفاري من غروس مضاليل
معا حليب العرب من كل مزغار

ياما حلى مراوحها لا اظلم الليل
ترعى نبات الروض غاشيه نوار

حب العرابا في الحشا له مداهيل
ورث ورثته من جدوزدي هل الدار

ياما حميان العرب جيل باثر جيل
ونرد من صوب المعادين الاخبار

معا بني عم عصاة على الخيل
الآد ابن رامث هل المدح والكار

نتلى شيوخ تكرم الضيف بالحيل
دعوى شكابين قديمين الاذكار

لا جا نهار فيه حذف الدساميل
رجا لهم يارد على وهج النار

يروون حد مرهفات المصاقيل
لطامة للشره ضد للاشرار

وانا من اللي باللقا تعدل الميل
جدي صليب الراي لا جات الاشوار

ينقل ثقيل الحمل بالعزم والحيل
ولا هوب عن نقل الثقيلات جظار

واليا لفواهل ضمر تالي الليل
ما حسب لكثر المخاسير صبار

يذبح سمان الضان معها التساهيل
ريف الضعيف ومكرم الضيف والجار

عزي لمن يرجي خطاة الرجاجيل
اللي ليا جات المواجيب خوار

لا مكرم نزل ولا شايل شيل
طبعه على الخاطر تجي منه الاكدار

لا تعشه يا داعج العين بالميل
ترى ردي الساس عفن وبوار

خبل حديثه في المجالس هرافيل
في ساقة الطيب كما حد منشار

بين الجماعه ينقل القال والقيل
هرج النمامه له ورود ومصدار

هذا حصيله يوم تطرى المحاصيل
مجنب درب النشاما والاخيار

بحسناك يا منشي حقوق المخاييل
تسقي ديارا مصلحة حسك الاوبار