ياهل السواليف

ياهل السواليف ياللي هرجكم كله تخاريف
ترى الرحى لو تدور بحبكم تظهر طحينه

اطيبكم اللي يمنى الروح في روس المشاريف
وان جته بقعا بطاروق القشر بيح كنينه

ماله معى الموقف الغصاب حيلات ومحاريف
اقل ما يجزعه لكن عسى ربي يعينه

ما للمواقف يكود رجال يحمون المواقيف
نهار يحمى الوطيس وتظهر الفارس يمينه

يردون حوض المنايا ما يحسبون التكاليف
كم ذيب اسحم نيابه فالليالي كاسرينه

وانتم على ماش ياهل الهرج غاد لكم تواصيف
يالين جيتو على سطح القمر من غير عينه

تلوون عوج الملاسن في هروج الكذب والزيف
ليت البخاري وعى لهروجكم ياهل الرطينه

والله ليحرم عليكم فالمجالس سوقة الكيف
لو اكشف الخافيه من زعمكم واظهر دفينه

مير ارحلوا عن وطنا منتم اهل الرمح والسيف
السيف للي نهار العز ما تقصر يدينه