البيارق

من الغالي لفاني الليل طارق
وعداني لذكرى ما تفارق

بعد ما طالت الغيبه علينا
قدح من طارف المجمول بارق

يجدد ما اندثر من ماضي له
وارز من فرحتي له البيارق

اقلب ذكرياته واتسلا
وخدي من غزير الدمع غارق

انا من حب خلي ما اتملل
وحبي له عن العربان فارق

اسوق الشوق له واسرف بحالي
غلا يالين ذابن المطارق

وكيف ابخل وهو لذة حياتي
وقلبي لغير همس اشفاه مارق

ليا منه تكلم قل هرجي
كلامه للعقل والوجد سارق

ولامنه ضحك وابدى ثمانه
تقل لاحت علي شمس المشارق

انا رهنه ولاني عنه جايز
وانا للي عذلني فيه دارق

ليا حاول يغير ما تصور
بعيني قلت له بالله فارق