الحرب شب

يازبن كرّب فوق مايطرد النوم
حراير(ن) يازبن مثل الاهلّه

مرباعهم مابين ظلم(ن) والاكموم
ومن السفايف يرمحنّ الأظلة

ملفاك شيخ(ن) بالقسا يذبح الكوم
شيخ(ن) وشيخان القبايل تدلّه

تلقى محمد زبن من كان مضيوم
زبن الذليل اللي مخيف(ن) محلّه

واليا لفيت الشيخ يازبن ملزوم
تعطيه مرسوم(ن) بوسطه سجلّه

وان كان جيت النضو يازبن ماسوم
رد الخبر والنضو يازبن خلّه

جانا من الشايب مكاتيب وعلوم
حيّ الكتاب اللي لفا حشمة(ن) له

الشايب اللي ينقل الكبر والزوم
باغي لحكمي مير انا عاصي(ن) له

الله يغشّك يوم غشّيتنا اليوم
تقرا الكتاب ولا تهاب المظلّه

جزاك من عندي من الخيل حثلوم
مثل البرد من مزنة(ن) مستهلّة

إن كان تذكر سابق(ن) لك من اليوم
فرس عتيبي ورد شاهد(ن) له

أنا برمحي باول الخيل ملحوم
والا انت رمحك عند سارة تشلّه

أديت انا اربع قحص والخامس التوم
بقعود زبن اللي بغا ما حصل له

لا والله اللي روحوا ربعنا قوم
تنافضت من بينهم بالأجلّة

والحرب شب وشبشبة كل شغموم
من اشتبه مخ الفرنجي عصا(ن) له

إعرف ترى من طاح ماهوب مرحوم
ياكود من رب الملا شافع(ن) له

شافي وجرمان غدوا باول القتوم
خلوا مطّوعهم وانا شاهد(ن) له

خلوا مطوعهم على غوجة التوم
عزّي لمن حطّ الردي مسند(ن) له

وانتم كما حوت(ن) على الشط لاهوم
وحنا خلقنا للواهيم علة

وانتم كما ضلع(ن) طويل(ن) ومزموم
وحنا خلقنا الله نجوم(ن) تهله

وأنتم كما طير البحر ذاك ابا الحوم
وطير البحر مايذبحه غير ظلّه