صدام العراق

من تغلى تخلى والله اني ل اخليك
وكنت لاطحت من عيني تلقتك الاعماق

صرت من حرة بي ومن تغليك..ما ابيك
ادري انك تثاقل تبتشب نار الاشواق

تحسب الحب لعبه..مدري وش شايف فيك
لاحبيبي ترى قلبي خذا الف ميثاق

لايحسب حسابك لا ولا يجيب طاريك
فاكر اني على خبرك غشيمه لك اشتاق

لا هذا من اول, يوم ب العمر افديك
يوم انا فيك هايم, يوم اناظرك ب اشفاق

مير ربي رحمني يوم بين بلاويك
لادهمني خيالك آتعالج ب ترياق

تمتحني ب حلو القول تبغاني اشريك
ادري انك كما داب به السم زراق

وادري انك تكمل نقص فيك ب تغليك
بس ياقو عينك تحجب ب يدك الاشراق

وش لقيت ب غرامك غير حسره وانا اطريك
كنت لاغبت عني اذرف الدمع حراق

لاتمرجل علي ولاتحسبني ارجيك
انت صرت الضحيه وعيد لاحل الفراق

وانت برضو حليلك كثر كذبك معنيك
والله انك تذكرني ب"صدام العراق"

تكذب الصبح كذبه, والعشا وين اراضيك..!
وان نشدناك وينك.. قلت انا حيل مشتاق

انت مضحك ومبكي ماتحسب خطاويك
من تناقض كلامك صرت احسبك سواق