(( بـــــــــرد(ن) و جـــــــــــوع ))

ياليت لو تحضن خفايا وجوعي
يامنيتي من حر ماونس تعنيت

شب الحطب بدفا وتسكن هجوعي
تركتني بردان ياخل واقفيت

يحرم عليه الزاد برد(ن) وجوعي
العين تذرف ازرق الدمع واشقيت

اشقيت نفسي في محبة قطوعي
يقطع ولا همه شقيت او تهنيت

البرد اوهنِّي وكسر ضلوعي
لا قمت ادور لك بيأسي ترديت

ازريت ادور في رواح ورجوعي
صديت عني ياضنيني وتنحيت

مليت من جورك وقلبي جزوعي
يجزع لغيباتك ويجزع ليا جيت

ان جيتني تفرض علي الخضوعي
مانكس الهامه سوى لخالق البيت

والله ثم والله لو كنت توعي
لا ابيح بسدي لحي (ن) مع ميت

واغسل يديني من غرام(ن) خدوعي
واصم اذني وادعٌي اني تعاميت

هذا يكون افضل ولو فيه لوعي
لوعاتي ابرك من مياء الوجه كبيت