ظن ظالم

وش تدوّر منْ رمادي في مهبّك
ناوي ٍ تحْيي جمر ذكرى هويتك

ما تخاف الله فيني خاف ربّك
ذي جزاة العمركلّه لك فديتك

كنْت اقرّبلك فناجيلي لصبّك
أحْسب انّك صادق ٍ لا ما نهيتك

ما كفاك انّك على أكْلك وشربك
جارح ٍ غيري وذايع فيْه صيتك

أعرف ان جنبي مجنّب وانْت جنبك
جنّبه واعلم تراني لك نسيتك

لا تحاول في حنيني ذا مطبّك
كم على دربك تمشّيت ومشيتك

ما تفيد الحرب فيني لنّ حربك
جيشها حلم ٍ يعاني منْ مبيتك

ما أبيك ولا أحبّك كنْت احبّك
من بعد ذاك الجفا ما يوم جيتك

في سما ظنّك تشتّت سجّ سربك
تحْسب ان بالرّيش يبنى فيه بيتك

كان لك حظّ ٍ على خبري نشبّك
زانه انّك بايع ٍ وانّي شريتك

فيه ما يلقى صويبك غيْر ضربك
قالها من زود طعنك أكْتفيتك

لفّ في شرقك ووجّه يمّ غربك
واسأل ايّامك تقول انّي بكيتك

من عرف حالي معك دايم يسبّك
وانْت خابر كمْ دعيت ألك وعطيتك

ما تخاف الله فيني خاف ربّك
ذيْ جزات الحبّ كلّه لك عطيتك