ما ظن قبلي من شرد عن هوى الزين

ماظن قبلي من شرد عن هوى الزين
ولا ظن بعدي من يسوّي سواتي

ما هو غرور ولا تكبّر ولا دِين
ولا هو لأني ما أحب الحلاتي

ولا هو لعيب بمنسبه فيه شي شين
عريب جَد وخاله ابن الذواتي

لكن حداني عنه شيب(ن) بخدين
لا شفت شيبي هِبت زين البناتي

الزين يبغى الفرق حد أربع اسنين
إلى ثمان سنين لو زايداتي

يبغى توافق فكر بين المحبين
ويبغى توافق روح عند المباتي

ناظرت وإني وين أنا والهوى وين
مثل التهامي لا نظر للسراتي

غصباً أعذّر بعد شفت الموازين
هوّنت مُجبر خايف من الشماتي

يشمت بي اعدايه قريب وبعيدين
ويشمت بي اللي ما يساوي حذاتي

عودت أبنصح القليب المسيكين
يا قلبي عذّر واترك الالتفاتي

صلّ الفروض وغضّ لا شافت العين
وأطلب من الله الحور بعد المماتي

وختامها صلوا على ناشر الدين
نبينا الهادي عليه الصلاتي