شرد المعاني العاصيه

هاش قلبي وأنا قلبي اليامن هاش هاش
شاعرشدادي مفوه وجني لي تحوش

شردالمعاني العاصية ورمي(ن) شبيه كلاش
إن ما ارتجلتها في وقتها ياعلها لي ماتعوش

أجتاز فيها وأبتعد وأشد ماهوى الارتعاش
لاقمت أسابق فكرتي وألعب على المعنى وأنوش

تبقى معالم ضربتي ولارسلت سهمي ناش
ولاكل رامي رميته تحت النحر فوق الكروش

وقبل أبتعد عن فكرتي ويقال وش به داش
أو بالأصح أبكتفي من قبل غيري لايدوش

عاش من يرضى بمقسوم الولي عاش عاش
مؤمن (ن) يسعى وربه مايخلي من يشوش

الرجولة من أول بالمكاسب والتفاخر بالهواش
وبالكرم والنفس الزكية ولاهو بالقروش

والوفاء والعلوم الغانمة هي الخزينة والمعاش
والصبر معه التكاتف بالمغازي والجيوش

ويش أبكتب ويش أبترك والرجولة لون شاش
ويش أبذكر ويش أبخفي وأنتم أعلم بالنقوش

الرجولة ما تدرس ماتحدد ماتجمع في نقاش
لو تعدوا عليها يالعوارف ...........هالدبوش

المسمى يلوق اللي لاحضر يعطيك انتعاش
يضحك حجاجه وثقله علامة ماهو بمخروش

والعوارف قبلنا قالوا تكشف الرجال كاش
هرجته لامن هرجها تكشفه لو أنت مغشوش

كم فقير وكم خلاوي وكم كسيح وكم باش
وكم غني وكم أمير وكم صاخط بالنعوش

مايدوم إلا وجهه وغير وجهه ماش ماش
فانية يادنيا دنيئة تغطيها الرتوش