اهل الزعامه - شبيب النعيمي

يأهل الزعامه والفخر بر وبحر
الطيب مزن(ن) كل عين تخايله

لاحت بروقه بالمكارم والضفر
لجت ارعوده وأرهشت مخايله

سيله عمار الدار طمام الوعر
أكبر شعاب الارض منه سايله

هذاك فعلك يا ضياء الصبح الأغر
يا شيخ ابو مشعل زبون الطايله

سلام ما نسنس هوى الغربي عصر
من خافق(ن) صدق الولاء دلايله

بالعود الأزرق والخزاما والزهر
باسمي واسم ربعي وفت مكايله

ينبض بها الخافق بلسان وبصر
والقاف صوبك زرلفت ذلايله

تطوي سباريت الحماسه والفخر
الين عندك نوخت رحايله

يا صفوة القطبين من بدو وحضر
ياللي جميلك مانحصت جمايله

من سيرتك نستخلص دروس وعبر
أصغر معانيها تعدل المايله

مثل المطر لامن تحدر وانهمر
طيبك غمرنا والشعوب تخايله

يالفذ يالجهبذ في برد(ن)وحر
الفضل من فضلك رقت فضايله

بحر الندى قهر العدى الحلو الأمر
حلال حال الي حلوله حايله

في كفك من الجود رعاد ومطر
وفي وقفتك يخفي الزمن نكايله

والجود من جودك تجلى واشتهر
والسيف منك حده وصمايله

غيث(ن) تغيث المستغيث من القهر
اليا اجدبت جرد الفجوج الغايله

وان دقت الساعه نواقيس الخطر
والقول زعزع هقوة الي قايله

عزمك يزلزل صم جلمود الصخر
وظلك يظلل من لهيب القايله

تحل ما لاحل من قبلك بشر
والصعب عندك تنفرد حبايله

يشهد لك العالم ويبصم بالعشر
لانجازك الي كل مجد(ن) نايله

مقدم هل العلياء مطاليق الشبر
لاجلجل البارود قب اصايله

ذروة تميم المجد من هامة مضر
اهل البيارق والجيوش الصايله

حريبهم يصلى على نار الجمر
حليفهم فوق الثريا خايله

وأهل قطر في سر ولا في جهر
بالصوت الأعلى رددت قبايله

حنا قطر حنا قطر حنا قطر
جيناتنا مختلطه بنثايله

على الرمك واكوار حسكات الوبر
يوم المصوب يبتلش به شايله

رمحن يسل الدرع ويفيج النحر
وسيف(ن) وعزرائيل في سلايله

ما همنا كبر المكابر لو كبر
وما همنا غل الغليل وغايله

ماهمنا هرش الحرايب لو هدر
معنا لعقر الهرش قدره هايله

كالنار لا تبقي عليه ولا تذر
ياكم فرقنا خل من خلايله

عادتنا نقدم على الموت الحمر
لافرع المجمول عن جدايله

اما حياة العز والا يالقبر
الصيت يبقى والليالي زايله

© 2024 - موقع الشعر