قصايد مسافيط ؟ - شبيب النعيمي

ياللي تقول ان القصايد مسافيط
.صبرك وابسفط لك قصيده جديده

من قبل لاتزعل عليه ولاتشيط
.هاك القصيده(وانت روح القصيده)

الشعر له عندي وكاله وتضبيط
اطوع افكاره ولوهي مريده

يوم ان بعض الناس قافه خرابيط
وان قالها جات المعاني زهيده

محبط الجمهور بالصوت تحبيط
ومن قل فيده مالقا اللي يفيده

وبعض العرب قافه سوات المخابيط
.دكتور شعر وكل طرقن يجيده

(لكن ياخلي على غير تخطيط
ربي رمابك في بيوت القصيده)

الشعر وحروفه لحبك مقاليط
واجلس واسمعك البيوت الفريده

واصحا تقاطعني وخل التشاريط
والا عجبك البيت قلي واعيده

حتى تعرف ان الضماير مرابيط
قلبي اسير وحبك اليوم قيده

ولولاك ماهوجس وجر التناحيط
ياللي غزيته عبر مجرى وريده

ان قلت ابسلى عنك مامن مفاريط
وان جيت لوصالك ضروفي عنيده

ياعين حرن في رفيع المناويط
ومن وصف خشف الريم خده وجيده

هدي الحقيقه كانها بالمسافيط
انت القصيده وانت روح القصيده

© 2024 - موقع الشعر