نقطة نظام - فراق - شبيب النعيمي

نقطة نضام اخبرك عن غرامك
من قبل لانهي سيرة الحب وياك

لعيون عهدك والغلا وابتسامك
والصدق والعشره وشوقي لقياك

عزمت اعزي في وجودك عدامك
واكفنه في تربة الصد وانسااااك

ماني مقلل قيمتك واحترامك
لاني عشقتك بالوفا(حس وادراك)

كل الغلا يخضع لحضرة مقامك
(من الفه لالفه الى الفك وياك)

حتى انسجامي ينسجم بانسجامك
ضني على ضنك ولاماي لاماك

كنت الاهم وكان اهم اهتمامك
يهتم بي من دون هذا وهذاك

(شفرت قلبي عن سواك بهيامك
بن كود بحروفك وطيفك وطرياك)

(مايستجيب الا لشفرة نضامك
سستم حمايه عن هوى الغير بداك)

منّه قصيدي هامبك واستهامك
لحن عليك اوتار حزنه وغناك

من قبل لاتطعن خفوقي سهامك
اللي بها سم الغدر صنع يمناك

ياخاين العشره حلالك حرامك
لو مانطقته ساطعن في محياك

وشعاد لو يبرق بجوي غمامك
قلبن رواك سنين ماعاد يضماك

روّح وروح ولا تكثر كلامك
لابو غرامن يجذب القلب لحماك

(حجزك فرست كلاس واربط حزامك
ون وي مافيها معا الوقت كم باك)

هذا الطريق اللي تشوفه امامك
احسن طريق يضم مثلك وشرواك

لكن قبل ترحل لداجي ضلامك
عندي طلب لوكان ماكان يهناك

تعال واخذ اللي بقى من غرامك
لاعاد تترك شي لوكان ذكراك

ارحل وانا برحل وابطلق زمامك
وعذري معك(من حبك اليوم جافاك)

© 2024 - موقع الشعر