مقدسات الزعامه

الصبر طال وقلت يمكن تحسين
بالعرق وامواج الغضب والكرامه

يالله مدام انك كذا تستبيحين
كل الطرق ومقدسات الزعامه

يابنت حنا دايم الدوم وافين
ولانعطي الموضوع فوق اهتمامه

واللي خلق مع العسردوم يسرين
ماهمني كثر الحطب واحتطامه

انا رجل مافيه مثلي مثيلين
انا الوفا اللي ماتلاقي غرامه

بين الدروب الوافيه والعزيزين
هذا الكلام اللي تضرك سهامه

رح واعترف بالذنب واحنا غفورين
لاكن تجنب يعلو السيف هامه

يارب ياعالم بحال المقفين
مافرقوا بين الحلال وحرامه

يابنت حنا من رجالن عزيزين
فينا الولد قدام لحظة فطامه

يبني مراجل مابنوها الضعيفين
يوم الردي يقول يالله السلامه

يابنت حنا مانهاب السلاطين
وش عاد بنهاب الكحل واللثامه

يابنت كان انك بقولي تحسين
روحي فمان الله مالك مقامه

ماني ضعيف ولاجبان ومسيكين
راسي تعلى نايفات الغمامه

ازرع من ورود القوافي بساتين
واركب على ظهر الجواد ولجامه

بيدي ونا نايف على العسر واللين
مايندفن راسي سواة النعامه

كنت احسبن الطيب سلم المحبين
لابارك الله بالخفوق ونظامه

هذا انا شامخ ولاقلت لك سين
اوجيم في مجمل كلامي شهامه

انا رفعتك وانت مغروس بالطين
وعليت راسك فوق قامه وقامه

والحين حنا من غرامك بريين
ودعتك الله للندم والندامه