الخوّه اللي كلها زيف وخداع
عيب ٍ على الرجال يطرد وراها

والخوّه اللي تجعلك بأسفل القاع
خلك بعيد ولاتجي مستواها

هذي نصيحة واحد ٍ ماله أطماع
ونظرة عيونه مبعد ٍ في مداها

أنشد مجرب عن دوا بعض الأوجاع
يعرف مرض بعض النفوس ودواها

اللي ورى كثر الاقاويل منصاع
لاعاد تنشد هرجته وش وراها

لاجات له صاعين يكيلها صاع
يدمج مرارة هرجته في حلاها

يشبع من اعراض الاوادم ليا جاع
مبلي ونفسه زايد ٍ في بلاها

واللي ورى عيوب المخاليق تباع
وعيوب نفسه ياكثر مانساها

بيته قزاز ويحذف الناس باذراع
وبكره عليه الناس تحذف حصاها

واللي معك في خوته دوم طماع
خوة مصالح واضح ٍ مبتغاها

لأحتاجلك يبديلك الطيب بأنواع
ويبعد عنك لو حاجته ماقضاها

مادام خوتهم على زيف وخداع
خوة هذولي يافهد مانباها

الله ولاخوة رديين الاطباع
اللي فعايلها تدنس لحاها


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر