لأجلك نويت أسكت وأربّط لساني
دام الكلام اللي يجي منه زعلك

الشوق يمك ياحياتي دعاني
أرجوك واصل من يشوقه مواصلك

حبك تربع بالضمير وكواني
وحبك بنا في وسط قلبي منازلك

غربلتني ياسيد كل الغواني
غربلتني ياجعل حبي يغربلك

أنا الذي ربي بحبك بلاني
حبك شغل قلبي وياليت يشغلك

من سبتك في خافقي ماكفاني
ماعاد لي قدره أسامح واجاملك

سكرت عن هرج العذول الاذاني
والصدر فكيته لك انت ومشاكلك

حتى تمكنت وسريت بكياني
واعرف وش اللي فيك قدام لاسألك

وش فيك تعلن بالجفا يالاناني
وزود ٍ على كثر التجافي تجاهلك

(أخطيت يوم اني عطيتك حناني)
واكبر خطا في دنيتي يوم أدللك

هذا مكانك مير هذا مكاني
وهذي مخارجها وهذي مداخلك

كانك تباني صدق كانك تباني
أرجوك عاملنا مثل مانعاملك


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر