وش حيلتك وانت بزمانك خلاوي

وش حيلتك وانت بزمانك خلاوي?
والكل ضدّك فارشين(ن) لك بساط !

اي والله اني من شقاي الشقاوي
وصارت حياتي كلها ضيم واحباط

دنيا رمتني في كبير البلاوي
ومايمتنع قدري ولوكنت محتاط

أزريت أسجّل سجّتي بالخطاوي
وحتى البخت من عوج الايام مشتاط

ياحيف ياوقت(ن) يدوس النداوي
للخيل مرباطه ... وللكدش مرباط !!

وقت(ن) ضما للحر والبوم غاوي
والقلب كنّه بين شفرات مشراط

زمان مايرحم ولابه تساوي
والحر صاير بين فكّين وطواط

زماني اللي داشني بالهقاوي
اللي رمى بالقلب جمره بملقاط

احْدن تمنى (الروز) وحْدن (عراوي)
وحْدن تمنى عايش بعصر الانباط !!

وحْدن مريض(ن) مالقى له مداوي
وحْدن يبات الليل للهم خيّاط

نشقى ولانلقى ضمير(ن) صحاوي
وش هي حياة(ن) كلها دين واقساط

ماني على وقفات الاحداث راوي
بس الصراحه شفت شي(ن) به فراط

شي(ن) يشل العقل للروح طاوي
وياليتني للشعر ماكنت خطّاط

خطّين واستفهام ياهل العزاوي
والتاليه جمله مفيده بلا انقاط !!

طبّيت وسط القاع والذيب عاوي
واثر الحقيقه كلها خراط باخراط !!