كم شيخ قومن مابخص ربط الاوزان@كم شاعرن جده وخاله خلاوي - سعيد القير

لاهنت يالطيب وصح الله لسان
الشاعر اللي فالنداوي نداوي

ترا الصداقه يالعوارف لها شان
ماهي سوالف ياقريب الهقاوي

لو جاك من صاحبك زله وغلطان
حاكه على وضح النقا يالحكاوي

هرج القفا بين المطاليق نقصان
خلك سوات الذيب لاجاع عاوي

لا شفت لك بيتن من الشعر مليان
جاره على الاوزان لاصرت قاوي

بعض القصايد قافها نار بركان
لا صار قايلها على الطيب حاوي

اليا طلع سوا مثل طير حوران
طلعه سما مايلتفت للدناوي

كم شيخ قومن مابخص ربط الاوزان
كم شاعرن جده وخاله خلاوي

البندق اللي ثارت شوي دخان
ماحدن طمع في شيلها غير شاوي

© 2022 - موقع الشعر