ان قلت (هبْـس) .. القلب زاد ارتعاشه

شدّت عربهم وأعلن الحكْم تفتيش
زود(ن) على حكم المعادي دفاشه

امّا خذيت الحق يا راعي الجيش
ولا ترى الموضوع يكثر نقاشه

عليك يا وقت(ن) عثا فيه درويش
وقت(ن) عليم الله صعب(ن) معاشه

وانا غريب(ن) بين ربع(ن) مباطيش
ذباحة(ن) للاش ساعة طياشه

نسل الرجال اللي على راسهم ريش
اما ملك .. ولا امير(ن) وباشه

من قدم ربعي تخمش اللاش تخميش
وان قلت (هبْس) .. القلب زاد ارتعاشه

اليا تعانق صامل الشيش بالشيش
ينسى ذليل اليوم لذة فراشه

عزّاه من ذكر(ن) غدى فيه تشويش
صار الردي يهرج ويكثر حراشه!!

من قال لك حق الرياجيل تهميش؟
ناطى على غاربه حزة هواشه

لكن قسم بالله لو قلت لي ويش
ناس(ن) تزيد الجو عجّ وغباشه

يالله في نو(ن) يسوق المراهيش
نو(ن) عليه الظلع سهل انتعاشه

يدرج شعاب(ن) مدها السيل بشويش
حتى ينش الورد عقب انكماشه

يرخي على ستر الغنادير تنقيش
وينحت على كبد المولع نقاشه

واليا غدى في سرة القلب توحيش
ادخل على الله لا تصيب الغشاشه

وانسى ترى ذا الحزن ما وكلك عيش
واذكر عشير(ن) واهج الشوق جاشه

وين انت يا خدر العيون المراييش؟
جفني على شوفك يزيد اندهاشه!!

ام اللثام اللي مزاياه ما حيش
والله ستره مْن الحلوق النهاشه

يمشي كما مشي المهار المداغيش
حر(ن) يشيّد وسط قلبي عشاشه

غر(ن) عليه الصبر اولى من الطيش
ويضفي على حزن الليالي بشاشه

واللي ينعّش راعي الفكر تنعيش
واللي تتل القلب ومضة رماشه

واللي عسفت القاف لأجله بتنشيش
شاعر ولي في كل وادي نشاشه

انيخ له عرش(ن) على عالي الهيش
وحق(ن) على شعري يزيد ارتباشه

وان ضاع حقي بين ضابط وشاويش
أمره مطاع ومنزله في عراشه

ولا انت مطراشك نرده بتهشيش
قدرك وكل من جاد يقبض معاشه

رد الجواب الآن يا راعي الجيش
ولا ترى الموضوع يكثر نقاشه!!