عــــــــــزّاه - مشعل العريعر

البارحه هم(ن) على الراس يقزيه
ويلعب به الهوجاس باقصاه وادناه

وش حيلة اللي بيح الوقت خافيه
ناسي من اسباب المقادير ما جاه

ان جيت ابخفي علة الراس يا هيه
وانشد عن الخافي ولا ودي القاه

لا شك فكري كل ما قلت ببنيه
يرقى على رجم الهواجيس مبناه

حتى غديت من المخاليق عانيه
اسباب غر(ن) فزّع القلب طرياه

اللي يا بو خالد ليا جبت طاريه
يفز له قلب(ن) عن العوق يفداه

لا نسنس الغربي عسى ريحها فيه
ولا عسى صلف الهوا حار مسراه

ربّع على صدري وهذى مفاليه
ويحفر على عوج المعاليق ذكراه

يا قلبي اللي كل ما غاب غاليه
وحارت به الايام والوجد يبراه

وضاقت به الدنيا وكثرت بلاويه
كنه على جمر الغضى صار ممشاه

قلب(ن) يحبك لا تذله وتفنيه
خله عسى عذبات الايام ترفاه

جيت اسألك بالله ليه انت جافيه
ولا حلا لك تسمع اليوم رجواه

يوم ان قدري عند الاجواد عاليه
ماهو بحق(ن) ياريش العين تاطاه

الحب نبع(ن) كدر البعد صافيه
وانا سقيت المر من طول فرقاه

لا شربة(ن) تروي ولا الصبر يغنيه
غير ان صبري ضيق الشوق مثواه

وان كان يغليني فأنا اليوم بغليه
ولا غلاهم يا عسى الموت يغشاه

وان كان وده سرة القلب بعطيه
اللي على سلم الاجاويد مرباه

والله من اسباب المقادير ينجيه
وادعي اله العرش بالحيل وارجاه

وان طالت الفرقا و بانت تواليه
يستر عليه الله وانا اقول عزاه

© 2023 - موقع الشعر