تنشد عن الحال؟

أنبيك ياللي تنشد الحال وشلون
قلبي غدا مكسور من عقب عزه

والحال شوفه بين رمشين وعيون
دمع(ن) على الخدين في كل حزه

والوجد فيني بين الاضلاع مسجون
والقلب ياوي لك وللشوق وزه

والقلب عوّد سبت الهم محزون
والشوق هز القلب ياخوك هزه

الله على قلب(ن) غدا فيه مزيون
حلو(ن) نباه وفيه هيبه ورزه

له قدر عندي فالمعاليق مكنون
لا شك في عيني عظيم(ن) منزه

قلب(ن) يحبك يالغضي فيك مفتون
امسى ذليل(ن) عقب ذيك المعزه

وانا خفوقي ما رضى عيشة الدون
يا كيف ذل الوجد قلبي ولزه

بالهون يا ظبي الطعاميس بالهون
اليا خذيت القلب تكفى تعزه