وين الغريب ان قلت لي زعلان

وين الغريب ان قلت لي : زعلان !؟
حتى أنا زعلان من نفسي

متخاوي ٍ سعدي مع السجّان
في قبْو ما تاصل له الشمسِ

مفتاحه اصبح في بطن ثعبان
منه عطيب السمّ ما يمسي

ما نيب مخلوقٍ مع الشيطان
من طينكم مجبول هالإنسي

ومن قال شاعركم وسيع بطان!
خنّاسكم سوّاه رومنسي

كنت انطح براسي جبل لبنان
رغم شموخه ما كسر بأسي

وليا نويت بكفّي المليان
أطلع بروح الفارس العبسي

عيني على كلّ البشر ميزان
(المليونير) و (سايق التكسي)

والرجْل اللي بخوّته إيمان
أقدّره .. لو كان (ماركسي)

ملعون أبوها خوّة الخوّان
غصّت بحلق الشاعر الهبسي

ألّا يهدّ .. الكان .. والما كان
ليته مراودني على الخُمْسِ

قلبي لهم من جملة الأوثان
واللي مضى له رجسْ في رجسِ

نقاوتي ما ودّها برهان
لى صار صدري معْلَمٍ قدسي

من يدخله يبقى عزيز اوطان
ويردّ جيش الروم والفرْسِ

ما يمنع إنّي أُعْتَبَر خسران
وجه الأمل ما يطرد النحسِ

شيلة رفيقٍ من ورا القضبان
أصعب ترى من شلعة الضرسِ