ابن زيد العريعر

طرالي ذكر حي(ن) ما نسيته
رفيق(ن) بالمراجل له فراده

ذكرته في حروفي والقصايد
عسى عمره سنين(ن) في مداده

وطرالي ذكر رجال(ن) تكبّر
جحد علمه ولا يبغى الافاده

أحد ذكره ترى دايم يخلد
وَحد ذكره غدى هم ونكاده

امور(ن) بعضها ساطع وباين
وامور(ن) ما جلى عنها سواده

الا يا من عرفت العلم كله
وعرفت الشر من باقي رشاده

الا يا من نكرت الحق فينا
وجحد الحق تخريب وبلاده

ترى ما ينكر التاريخ عاقل
ليا صارت علومه في زياده

حلومك والحقايق فرق شاسع
خلطت الحلم مع باقي سهاده

فلا نامت عيونك لو تكبّر
ولا ذاقت طعم لين الوساده

تحسب انك فطين وصرت تفهم
وفهمك ما يجي الا بركاده

تسَمّع للونين اللي في صدره
وش الرجال من دون الأراده

وش الرجال لو ضاعت سُلومه
وكل(ن) له سُلومه واعتقاده

يحَسب اني نسيت اللي قبلنا
وكل(ن) يذكر الماضي وعَاده

ولا منك ذكرت العلم كله
فلا تنسى معي علم و وِكاده

وكاد العلم ياصل كل مسْمع
لان ربعي لهم سبق الرياده

ترى اللي يجحد العلم الموّكد
يموت ولا بعد ينفع عناده

واذا كان الشعر بحر(ن) يسيّر
برده لين يغمرك بمداده

واذا كان الفخر عيب ونقيصه
ابفخر لين يكسيك بسواده

واذا عيب الرجل فخره بربعه
فانا العيب المقيم بكل عاده

ابفخر بالخوالد كل حزه
الين الساس ينهد بعماده

وبفخر بالرجال اللي حداهم
عظيم(ن) ما طلب منك الاشاده

وبفخر بالبيوت اللي كبيره
مداخلها تراحيب وسعاده

وبفخر بالسموت اللي ورثنا
وبفخر لا هَمَا طلق الزناده

لنا مجد(ن) عظيم بكل ديره
وحتى البحر يشهد بإمتداده

ولنا بين العرب قدر(ن) وقيمه
وعلى الرجال لا يمرض فؤاده

خوالد لو نبيها جت بذله
ونرقى كل ما يحْلى صِعاده

خوالد عزوتي بيض الفعايل
هل الطولات في حرب ونداده

بني خالد ليا قلنا فعلنا
وكم حر(ن) تشرد من بلاده

شربنا الموت من مورد عذوبه
ونسقي من يعادينا فساده

لأن العز مطلب كل ضامي
وحنا بيرنا عسْر(ن) وراده

وانا من نسْل حيّاف الحبارى
عريعر سادها نعم السياده

فلا للمجد بعده من عظيم(ن)
ولا بطن(ن) اجادت بالولاده

ومجدي ينولد في كل لحظه
ومجدك ميّتن تعلن حداده

لاني من رجال(ن) قد تعدّو
وسَبَقنا قبل لا يسرج جياده

ابن زيد العريعر في اصولي
وكل حر(ن) سعى يبلغ مراده

عرفت اني من رجال(ن) عظيمه
لنا في كل رجّال(ن) جلاده

وصغير(ن) لو بغى عالي الثريا
تجي تسجد ذليله في مهاده

ولكن حكمة المولى تعالى
خَلَقنا للمعاد وللعباده

ولا منه درى عن كل ربعي
فذكر الحق اولى باجتهاده

وعلى خير البشر صلّي وسلِّم
وربي له صلاتي والشهاده