مجاراة لقصيدة عبدالله بن عون - كديميس العصيمي البرقاوي

قصيدة عبدالله بن عون
انا قلبي عليه الحب لا طي

وصواب الحب في اقصى القلب ساطي
تمكن حب خلي من ضميري

فتق في الجوف فتق ٍ ما يخاطي
ولا بينت مابي لين حبه

بشع بالقلب واحدث به نفاطي
شعاني جادل ٍ لا عاد عرفه

سقط حبه على قلبي سقاطي
خياله مايفارق عن عيوني

على طول المغيبه والتباطي
ولالاني مستحي ناديت باسمه

بوسط الماقفه كاني شراطي
ومن جاني يقول انته علامك

اقول افزع لمن كثر اختباطي
ترى الفزعه لها بالطيب ساعه

لو البارود غادن له شياطي
انا محتاجكم ياهل الحميا

على درب الزرج عن كل خاطي
تراني ماتذوق النوم عيني

لامن الصبح يبدي له شعاطي
ليا من المعافا طاب نومه

لذيذ النوم في عيني سماطي
اصارع هاجسي ماعندي الا

ثلاث دلا ل يشدن البطاطي
مدابيح ٍ على جال المناره

خنين الهيل فيهن له عياطي
ثلاث ٍثالثتهن دون منهن

صهدهن كانها غرنوق شاطي
انا يصلاني الهاجس عليها

وهي تصلى على جمر الاراطي
صلاها قهوجين ماتوانا

يسهرها لايا نام السباطي
لياقدم لي الفنجان منها

تجلى خاطري بالانبساطي
وخليت القلم يذرف مداده

على صفحات الاوراق القشاطي
باهازيج ٍ تونس من قراها

من الاثمار القطهن لقاطي
اقطف مازهى لي من ثمرهن

واخلي مايطيح من البطاطي
عسى اللي يلحق العاشق ملامه

من اللي صابني ياطاه واطي
على شان يعرف قدر المحبه

ولا عاد يتمادى فالاغلاطي
وعساه ان ماعذر عقب التجارب

تصيبه في الجسد حمى رهاطي
***

مجاراة كديميس بن صالح العصيمي لها
انا مااكشف صناديق ٍمغاطي

وانا ادري ان الغطى وراه غاطي
ولاني بعترض رجل ٍمجنب

ولا استعرض نشاطه مع نشاطي
ولو صرت افتهم نضم القوافي

نشاطي مايزود عن انظباطي
لكن ليا عرض بعض النوادر

مثل ماقيل في جمرالأراطي
جذبني مستوى بيت القصيده

ولا قصدي تحدي واعتباطي
انا احب المعاميل القديمه

الي معهن علاقه وارتباطي
اذا كانت على خمسة عناصر

هذا غاية مرامي واشتراطي
على البن اليماني والعويدي

وعلى الهيل المعلب بالشناطي
وزباد وزعفران ٍمن سمطرا

وبعده العود في المدخن يعاطي
ولا قصدي هواجيس الموده

ولا شاعفني الحب الحشاطي
مجال اهل الهوى مالي وماله

ولا لي في بضايعهم تعاطي
ماعاذ الله يجذبني هوايه

ليا الخلوه وحب الاختلاطي
انا قد قال لي رجل ٍمجرب

يغوص البحر ويطوف الشواطي
يقول انه تعرض له مشاكل

مع البيض العماهيج النشاطي
يحطن العسل فوق الزمرد

مع السحر الحلال مع المشاطي
ويقول المكر فيهن والخديعه

ورصدت لمكرهن كل احتياطي
وغدن بمكسبي مع راس مالي

وخذن من تحت رجليني بساطي
عقب ماكنت ادور للفوايد

رجعت اجلس على رقط البلاطي
يقول ان الهوى بيت ٍمزبرق

وسيع ولا على بابه ارباطي
مقر ٍللهموم وللحسايف

وبسؤ الظن والغيبه مُحاطي
ويقول اهل الهوى فيهم طبايع

وبحرهم بين مده وانسفاطي
بعضهم يعتلي روس المبادي

اله في مستوى القمه مواطي
ليا شرف على راس البتيله

تجدد مابصدره واستشاطي
وتواردته مزاهيف الروابع

وتذكر مامضى له بالنقاطي
رجوله ماتفارقها الشواظي

وعيونه مايفارقها العراطي
وبعضهم يجتلد كانه مكلف

بذرع الارض من شاطي لشاطي
معه بندق ودربيل وربابه

ومعب ٍمزهبه داخل قواطي
وليا شاف الحبيب اللي يحبه

تحزم للمراقب واستحاطي
جمع له صاحبه رغبه ورهبه

من الرهبه يخاف من الزراطي
وبعضهم ينطوي كنه مصوب

وتمر ايام ماشاف السماطي
وليا نامت عيون الناس عينه

تقول انه دخل فيها الحماطي
كتوم ٍمايعلم بالسراير

فلا تامن عليه الانفراطي
مثل ماصار مع مجنون ليلى

عقب ضغط الهوى صار انحطاطي
نسأل الله عفوه والسلامه

اذا جا في البشر عالي وواطي
لو ان الرجل ينظر في معاده

درى انه ماعلى الدنيا اغتباطي
وحسب للغبن في يوم التغابن

نهار الحشر والعالم خلاطي
وحضر ميزان لاعمال البريه

وعلى متن اللظى مد الصراطي
وتبرى كل خل ٍمن خليله

اذا وصل العرق فوق الاباطي
هذا اليوم الذي يحسب حسابه

يضيع ابه المجامل والتواطي
© 2024 - موقع الشعر