قصيدها مهداة لعبث بن علي المرشدي - عبدالله مرزوق المرشدي

انا رفيقي لابغيت المطاريش
قرمٍ يسلي خاطري يوم اخاويه

لاضاق صدري مانصيت الدراويش
اشوم للي مبعداتٍ حراويه

ابو علي ريف الكبود المعاطيش
لامن ولد اللاش بانت دعاويه

غيثه مثل غيث المزون المراهيش
يعطي ولا ياخذ مكاسب عطاويه

منصاً لخطلان اليدين المباطيش
ملفى الكرم والجود محدٍ بغاويه

سقم العداء عون الضعوف المرابيش
لاخابت الاريا تورد هقاويه

ستر العيون اللي هدبها عكاريش
لاطار ستر اللي تكشف غطاويه

مثله نشّري خوته بالمحاويش
لابان فيه الخير والطيب حاويه

ياما حلى مسراحنا بالغبابيش
على مديل الفين جيبٍ مهاويه

شاريه من ماله بليا بخاشيش
فكسار للمقناص والبعد ناويه

صنعة خبيرٍ طرزه بالدناديش
جود مواطيره ووثق عراويه

لادق سلفه مايجي له وشاويش
ماتسمع صياحه ولوكنت كاويه

ابيض على جنبه تبين الخرابيش
خطن رفيع اميله ثم لاويه

كنك تشوف ام الهدب والتناقيش
لاشفت وجهه بالعذارا تساويه

تنوّشه عينك ليا اقفى تناويش
تمييز وصفه بالقفا مانت قاويه

تشوف بالطبلون مثل الغراريش
فيها رقومٍ تخبرك عن حكاويه

في داخله مثل التحف والمفاريش
يسحر نظرك اليا نظرت اللاهاويه

مقصورته مكتب زعيم البشابيش
حسني مبارك والذي من شراويه

كن المناظر فيه تلبس طرابيش
امزينه للي يناظر تراويه

لاشع نوره كن ضاحه فلاليش
تكشف له ابعاد الطريق ومهاويه

اذا مشاء مع قاع والا خفافيش
ماهتم في زين الطريق وبلاويه

واذا مشاء بالخط ماله خرافيش
ولا لف باللفات ماحلى تلاويه

لامر من عند النقط والتفاتيش
دقوا تحيه والملازم يقاويه

كل الجيوب الغاليات المنافيش
لوجات مثله بالشكل ماتساويه

نقطع فجوجٍ مبعداتٍ مطاشيش
ياكم وكم ميلٍ من البعد طاويه

واذا نزلنا منزلٍ به رشاريش
روضٍ سقاه الوسم وادرج علاويه

في صحصحٍ ماقد وطوه المخاريش
ولاطبه اللي كاثراتٍ شكاويه

مافيه غير الذايرات المواحيش
وريح الخزامى مع مهفة هواويه

قفرٍ خلا ماقد رعوه الطواريش
ماطبه الجمال قدام شاويه

جبنا الدلال وماحوت من مهابيش
في جال نارٍ فوقها الصيد شاويه

سوالنا كيفٍ بليا مغاشيش
وزان القصيد وكيفتنا قهاويه

هذا رفيقي بالحضر و المطاريش
هذا عبث ياسعد منهو يخاويه

اخذ من الجزله واكب العراميش
لعيون من بالمجد حقق مناويه

© 2024 - موقع الشعر