الله عليه اشلون عيد بدوني
وانا بعيدي ماتهنا بدونه
لا والله الا فيه خابت ضنوني
وانا على عهده مخيّب ظنونه
عيدي قضيته بين هم وغبوني
وعيده وناسه ماشكى من غبونه
ياوجد حالي وجد من به طعوني
كسير حربٍ مثخناتٍ طعونه
خلوه ربعه بين ذلٍٍ وهوني
تدمع عيونه كل مازاد هونه
يبكي على فقد الاهل والضعوني
يذوب حاله يوم قفت ضعونه
على الذي يحوي جميع الفنوني
من كل وصفٍ زين كمّل فنونه
الجادل اللي زاد عوده ليوني
ريان عوده ناعمٍ به ليونه
راع العيون اللي حورها فتوني
اهداب رمشه للمعنى فتونه
لاهز رمش العين يسحر عيوني
ماقدر اناظر في نواعس عيونه
وان قال ياحبي تهيض شجوني
صوته يهيض بالمولع شجونه
من حلو صوته ضاعت ابراج فوني
ماغير اردد آه ياحظ فونه
ماغير انا والشوق دونه ودوني
شوقي ورا شوقه وجنبه ودونه
لو زاد بعده يوم سبب جنوني
وانا صراحه ميتٍ في جنونه
صادق بحبي مايفكر يخوني
وانا بعد مثله مافكر اخونه
ظني بمحبوبي لحبي يصوني
حتى ولو ماصان حبي بصونه
يامر على روحي وكلي يموني
وانا عتابه بس ماقدر امونه
واجد كثير اللي لقربي يبوني
وادري بعد ياكثر منهم يبونه
قلبي يصيّح مالقى من يعوني
قلب العنى ياليت ربي يعونه
بالله ياللي في مكانه تجوني
لاصار غافل مادرا لاتجونه
لانه يخاف من اصل طبعه حنوني
مشاعر المجمول جدا حنونه
عن حال ملهوف الحشا خبروني
وعن حالتي ياليت لو تخبرونه
قولو بحبه كاثراتٍ ديوني
قلبي بحبه غارقٍ في ديونه
مانساه لو باحلى البني خيروني
والمشكله لو كان بيخيرونه
ياناس احبه صدقو واسمعوني
وان ماقتنعتو ليتكم تسمعونه
خلوني اكتب علكم تفهموني
يمكن لطيف الروح ماتفهمونه
شعري على حسنه يسطر لحوني
واكتب جزيل القاف وابدع لحونه
اذا قريتوا قصتي تعذروني
حتى ولو مظلوم ماتعذرونه
اللي قهرني كيف عيد بدوني
وانا بعيدي ماتهنى بدونه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين